“இளைஞர்கள் ஏன் வாக்களிக்க வேண்டும்? நமது குரல்கள் நாட்டை எவ்வாறு வடிவமைக்க முடியும்…?”

இலங்கை மற்றுமொரு முக்கிய ஜனாதிபதித் தேர்தலைச் சந்திக்கவுள்ள நிலையில், நாடு ஒரு முக்கியமான தருணத்தை எதிர்கொள்கிறது என்பதில் சந்தேகமில்லை. பொருளாதாரப் போராட்டங்கள், அரசியல் ஸ்திரமின்மை மற்றும் அதிகரித்துக் கொண்டிருக்கும் சமூகப் பதட்டங்கள் நிலவிக் கொண்டிருக்கும் நிலையில், இந்தத் தேர்தலில் எடுக்கப்படும் முடிவுகள் நமது தேசத்தின் எதிர்காலத்தைத் தீர்மானிக்கும் என்பதில் ஐயமில்லை. இலங்கையின் இளைஞர்களுக்கு, இது வெறும் மற்றுமொரு தேர்தல் மட்டுமல்ல; நமது விழுமியங்கள், நம்பிக்கைகள் மற்றும் சிறந்த எதிர்காலத்திற்கான நமது பார்வையைப் பிரதிபலிக்கும் ஒரு நாட்டை உருவாக்கும் வாய்ப்பாகும்.

சமீபத்திய ஆண்டுகளில், இலங்கை முன்னெப்போதும் இல்லாத பல கடுமையான சவால்களைச் சந்தித்து வருகின்றது. பொருளாதார நெருக்கடி, பணவீக்கம், அத்தியாவசியப் பொருட்களின் பற்றாக்குறை, தேசிய வளங்களின் தவறான மேலாண்மை ஆகியவை நாட்டைப் பாதிப்படையச் செய்துள்ளன. அதே நேரத்தில், அதிகரித்துவரும் வேலையின்மை விகிதம், தரமான கல்விக்கான மட்டுப்படுத்தப்பட்ட அணுகல் மற்றும் உயர் வாழ்க்கைச் செலவு போன்ற நெருக்கடிகளால் இளைஞர்கள் கடுமையாகப் பாதிக்கப்பட்டுள்ளனர். இளம் வாக்காளர்கள் அரசியலிலிருந்து துண்டிக்கப்பட்டதாக உணருவது எளிது, ஆனால் இப்போது, முன்னெப்போதையும் விட, அர்த்தமுள்ள மாற்றத்தை உருவாக்க எங்களுக்கு ஒரு வாய்ப்பு அமைந்துள்ளது .

எதிர்வரும் ஜனாதிபதித் தேர்தலானது ஒரு தலைவரைத் தேர்ந்தெடுப்பது மட்டுமல்ல; இது நம் நாட்டிற்கான சரியான திசையைத் தேர்ந்தெடுப்பது பற்றியதாகும். பொருளாதார மீட்பு நடவடிக்கைகளில் நாம் எவ்வாறு முன்னேற வேண்டும், ஊழலை எவ்வாறு எதிர்கொள்ள வேண்டும் மற்றும் எதிர்கால சந்ததியினருக்கான வாய்ப்புகளை எவ்வாறு உருவாக்குவது என்பதையும் இது தீர்மானிக்கும். இளைஞர்களாகிய நாம், பெரும்பாலும் புதுமையிலும் சமூக மாற்றத்திலும் முன்னணியில் இருக்கிறோம்,எனினும் ; நாம் வாக்களிக்கவில்லை என்றால், நமது குரல்கள் கேட்கப்படாமலேயே போய்விடும்.மேலும் நமது தலைமுறையின் சவால்களையும் ஆசைகளையும் முழுமையாகப் புரிந்துகொள்ளாதவர்களால் எதிர்காலம் வடிவமைக்கப்படும்.

“எனது வாக்கு ஒரு பொருட்டல்ல” என்ற தவறான எண்ணம் இளம் வாக்காளர்களிடையே பொதுவாகக் காணப்படுகிறது. ஆனால் ஜனநாயகமான நாடு என்ற அடிப்படையில் ஒவ்வொரு வாக்கும் பெறுமதி மிக்கது , ஜனநாயகத்தில் மாபெரும் தாக்கத்தை ஏற்படுத்தக்கூடியது. குறிப்பாக இலங்கை போன்ற நாட்டில், குறைந்த வாக்கு வித்தியாசத்தில் தேர்தலில் வெற்றி பெறலாம் அல்லது தோல்வியடையலாம். இளைஞர்களின் வாக்களிப்பு என்பது, நமது கொள்கைகளைச் செவிமடுக்கும் ஒரு தலைவரைத் தேர்ந்தெடுப்பதற்கும் நமது தேவைகளைப் புறக்கணிக்கும் ஒருவரைத் தேர்ந்தெடுப்பதற்கும் இடையிலான வித்தியாசமாகக் கூட அமையலாம் . நாம் பங்கேற்காதபோது, பழைய தலைமுறையினர் மற்றும் தொழில் அரசியல்வாதிகள் உரையாடலில் ஆதிக்கம் செலுத்துகிறார்கள். இதன் விளைவாக, நம்முடைய அன்றாட பிரச்சினைகளைத் தீர்ப்பதற்குப் பதிலாக, தற்போதைய நிலையைத் தக்கவைக்கும் கொள்கைகள் உருவாகின்றன.

இலங்கையின் இளைஞர்கள் மாற்றத்திற்கான சக்தியாக இருக்க முடியும் என்பதை ஏற்கனவே நிரூபித்துள்ளனர். 2022 ஆம் ஆண்டு நடைபெற்ற போராட்டத்தின் போது, பொறுப்புக்கூறல் மற்றும் சிறந்த நிர்வாகத்தைக் கோரி ஆயிரக்கணக்கான இளைஞர்கள் வீதியில் இறங்கியதை நாம் கண்டோம். இந்தப் போராட்டங்கள் நமது ஜனநாயகத்தின் நிலை மற்றும் பொறுப்பான தலைமையின் தேவை பற்றிய தேசிய விழிப்புணர்வைத் தூண்டின. எதிர்ப்புகள் மற்றும் விழிப்புணர்வை ஏற்படுத்தி மாற்றத்தைத் தூண்டும் அதே வேளையில், உண்மையான மாற்றத்தை ஏற்படுத்தும் சக்தி தேர்தல்களில் உள்ளது. நம் நாட்டை யார் வழிநடத்த வேண்டும்? மற்றும் நாம் எந்த திசையில் பயணிக்க வேண்டும்? என்பதைத் தீர்மானிப்பதற்கான நேரடி வழி வாக்களிப்புதான்.

இந்தத் தேர்தலில், குறுகிய கால இலக்குகளை விட நீண்ட கால தீர்வுகளை முன்னிலைப் படுத்தும் தலைவர்களைத் தேர்ந்தெடுக்கக் கூடிய சக்தி இளம் வாக்காளர்களாகிய எம்மிடமே உள்ளது. பொருளாதாரத்தை நிலையான முறையில் மீண்டும் கட்டியெழுப்புதல், இளைஞர்களுக்கு பொருத்தமான வாய்ப்புகளை வழங்கும் வேலைகளை உருவாக்குதல் மற்றும் கல்விக்கான அணுகலை மேம்படுத்துதல் ஆகியவற்றில் கவனம் செலுத்தும் கொள்கைகளுக்கு நாம் வாக்களிக்க முடியும். அதேசமயம் ஊழலைக் கையாள்வதிலும் , அரசாங்கத்தில் வெளிப்படைத்தன்மையை உறுதி செய்வதிலும், அதிகாரிகளின் செயல்களுக்கு பொறுப்புக்கூறல் அடிப்படையிலான தலைமையைத் தேர்ந்தெடுக்கவும் முடியும். இவை வெறும் அரசியல் கோஷங்கள் அல்ல – அனைவருக்கும், குறிப்பாக இளைஞர்களுக்கு நம்பிக்கையையும் வாய்ப்புகளையும் வழங்கும் ஒரு சிறந்த இலங்கையைக் கட்டியெழுப்புவதற்கான அடித்தளமாகும்.

இது வெறுமனே ஒரு வாக்குப்பதிவு மட்டுமல்ல,
இது பல தசாப்தங்களாக நம் வாழ்வில் தாக்கத்தை ஏற்படுத்தும் கொள்கைகளை வடிவமைப்பது பற்றிய குறிக்கோளாகும். வாக்களிப்பதன் மூலம் எங்கள் தலைவர்கள் எமது தேவைகளைச் செவிமடுக்க வேண்டும் , எமது பிரச்சினைகளைத் தீவிரமாக எடுத்துச் செயல்பட வேண்டும் மற்றும் இளைஞர்களின் அபிலாஷைகளைப் பிரதிபலிக்கும் எதிர்காலத்தை உருவாக்க அவர்கள் உழைக்க வேண்டும் முதலான எதிர்பார்ப்புகளை உறுதிப்படுத்துகிறோம் . மாறாக நாம் அமைதியாக இருப்பதால் பல சவால்களை எதிர்கொள்ள வேண்டிய நிலை ஏற்படும் என்பது உறுதி .

எம்மில் பலருக்கு இந்த ஜனாதிபதித் தேர்தல், வாக்களிக்கும் முதல் சந்தர்ப்பமாக இருக்கலாம். இது ஒரு பொறுப்பான தருணம், அதேவேளை மிகப் பெரிய வாய்ப்பும் ஆகும். இளைஞர்கள் என்ற அடிப்படையில் நாங்கள் இந்த நாட்டின் எதிர்காலத்தைப் பராமரிக்கப்போகும் தலைமுறை, எனவே அதை நாம் சிறப்பாகப் பயன்படுத்த வேண்டும் . இந்தத் தேர்தலில் எடுக்கப்படும் முடிவுகள் இலங்கையின் எதிர்காலத்தை ஆழமாக வடிவமைக்கும். வாக்களிப்பதன் மூலம், அந்த எதிர்காலம் எப்படியிருக்கும் என்பதில் நாங்கள் நேரடியாகப் பங்களிப்பை வழங்குகிறோம்.

தேர்தலுக்கு வாக்களிப்பதற்கு முன்னர், வேட்பாளர்களையும் அவர்கள் எதனை நோக்காகக் கொண்டிருக்கிறார்கள் என்பதையும் நன்கு புரிந்துகொள்ள நேரம் ஒதுக்குங்கள். வெற்று வாக்குறுதிகளாலும் ஆடம்பரமான பிரச்சாரங்களாலும் திசைதிருப்பப்பட வேண்டாம். மாறாக, அவர்களின் முந்தைய செயல்பாடுகளை, கொள்கைகளை, மற்றும் நாட்டை வளர்ச்சியடையச் செய்வது தொடர்பில் அவர்களின் பார்வையைப் பொருத்தமாகக் கவனியுங்கள். உங்களை நீங்களே கேளுங்கள்: இளைஞர்களுக்கான சிறந்த எதிர்காலத்தை உருவாக்க யார் செயல்படுவார்கள்? நமக்கு முக்கியமான பிரச்சினைகளை யார் தீர்ப்பார்கள்? மற்றும் மிக முக்கியமாக, இலங்கையின் எதிர்காலத்தில் இளைஞர்களாகிய நம்மை ஒரு மையப் பகுதியாகக் கருதுவதற்கும், நமது குரல்களைக் கேட்டுச் செயல்படுவதற்கும் யார் முயற்சிக்கிறார்கள்?

இந்தத் தேர்தல் ஒரு ஜனாதிபதியைத் தேர்ந்தெடுப்பது மட்டுமல்ல; நாம் வாழ விரும்பும் எதிர்காலத்தைத் தேர்ந்தெடுப்பதையும் குறிக்கிறது. இளைஞர்களாகிய நமக்கு, அந்த எதிர்காலத்தை வடிவமைக்கும் ஆற்றல் இருக்கிறது, ஆனால் நாம் முன்வந்து நமது குரலை உயர்த்தினால் மட்டுமே. எனவே, அமைதியாக ஒதுங்கி நின்று பார்ப்பதைத் தவிர்த்து, நமக்காகப் போராடும், நம் சவால்களுக்குச் செவிசாய்க்கும், மற்றும் நாம் அனைவரும் பெருமைப்படும் இலங்கையை உருவாக்கும் தலைவர்களுக்கு வாக்களித்து, நமது நாட்டின் எதிர்காலத்தை உரிமையாக்குவோம்.

இது நமது நேரம்!
நமது வாக்கு நமது குரல் !!
இளைஞர்களாகிய எமது எதிர்காலத்தை மாற்றியமைக்கும் சிறந்ததொரு இலங்கையைக் கட்டியெழுப்ப ஒன்றிணைவோம்.

Penned by : Rtr. Hisma Najath